काठमाडौं ।हमासले बन्धक बनाएका बेला मारिएका विपिन जोशीको शव आज नेपाल ल्याइँदैछ।
सरकारका अनुसार, विपिनको शव आज दिउँसो ३ बजे त्रिभुवन अन्तर्राष्ट्रिय विमानस्थलमा ल्याइपुर्याइने कार्यक्रम तय भएको छ।
ऊर्जा, जलस्रोत तथा सिँचाइ, भौतिक पूर्वाधार तथा यातायात तथा सहरी विकास मन्त्री कुलमान घिसिङले विपिनको शव बुझ्न र श्रद्धाञ्जली अर्पण गर्न विमानस्थल पुग्ने जानकारी दिएका छन्।
मन्त्री घिसिङले विपिनको निधनप्रति गहिरो शोक प्रकट गर्दै भने —
“यो खबर सुनेदेखि म स्तब्ध छु। हाम्रो एउटा होनहार युवाले अन्तर्राष्ट्रिय स्तरको अमानवीय र क्रूर हिंसाको सिकार बन्नुपर्यो। उहाँको अकाल निधनप्रति म हार्दिक श्रद्धाञ्जली व्यक्त गर्दै शोकसन्तप्त परिवारप्रति समवेदना प्रकट गर्दछु।”
उनले थपे —“तर त्यो अन्तिम त्रासदीको क्षणमा पनि विपिनले देखाउनुभएको अपूर्व साहस, बहादुरी र त्यागले अरू धेरै साथीहरूको जीवन बचायो। विपिनको यो वीरतापूर्ण कार्य उहाँको जीवनको सर्वोच्च विरासत हो। उहाँ नेपाली गौरवका प्रतीकका रूपमा सधैं रहिरहनुहुनेछ।”
परराष्ट्र मन्त्रालयका अनुसार, काठमाडौँ आइपुगेपछि विपिनको शव नेपाली सेनाको संयोजनमा उनको घर कञ्चनपुर लगिनेछ।
सरकारले विपिनप्रति राज्यको तर्फबाट सम्मानपूर्वक अन्त्येष्टि प्रक्रिया सुनिश्चित गर्ने तयारी गरेको जनाएको छ।
प्रतिक्रिया
सम्बन्धित खवर
